बुलढाणा जिल्ह्यातील प्रसिद्ध तीर्थक्षेत्र असलेल्या शेगाव येथून एक अत्यंत धक्कादायक आणि संतापजनक घटना समोर आली आहे. सध्या शेगावात संत गजानन महाराज यांचा प्रगट दिन उत्सव सुरू असून, राज्यभरातून हजारो भाविक दर्शनासाठी दाखल होत आहेत. या भक्तीमय वातावरणातच दर्शनासाठी आलेल्या एका १९ वर्षीय तरुणीवर लैंगिक अत्याचार झाल्याची घटना घडल्याने सर्वत्र खळबळ उडाली आहे. या घटनेमुळे शेगाव शहरासह संपूर्ण जिल्ह्यात संतापाची लाट उसळली असून, भाविकांच्या सुरक्षिततेचा आणि कायदा-सुव्यवस्थेचा प्रश्न पुन्हा एकदा ऐरणीवर आला आहे.
मिळालेल्या माहितीनुसार, पीडित १९ वर्षीय तरुणी संत गजानन महाराजांच्या दर्शनासाठी शेगावात आली होती. दरम्यान, एका तरुणाने तिला विश्वासात घेऊन मंदिर परिसरातीलच एका खाजगी लॉजवर नेले. तिथे नेल्यानंतर नराधमाने तिच्यावर बळजबरीने लैंगिक अत्याचार केले. इतकेच नव्हे तर, या घटनेबद्दल कोणालाही माहिती दिल्यास जीवे मारण्याची धमकी देखील आरोपीने पीडितेला दिली. या भयंकर प्रसंगानंतर पीडित तरुणीने हिंमत एकवटून तात्काळ शेगाव शहर पोलीस ठाणे गाठले आणि आपल्यासोबत घडलेल्या आपबीतीची माहिती पोलिसांना दिली.
घटनेचे गांभीर्य ओळखून पोलिसांनी तातडीने तपासाची चक्रे फिरवली. पीडितेने दिलेल्या तक्रारीवरून आणि माहितीवरून पोलिसांनी सापळा रचत आरोपीचा शोध घेतला. संशयित आरोपी हा मंदिर परिसरातच असल्याचे समजताच पोलिसांनी त्याला शिताफीने अटक केली. आकाश सोनाजी भामरे असे या नराधम आरोपीचे नाव असून त्याला बेड्या ठोकण्यात आल्या आहेत. या प्रकरणी पोलिसांनी भारतीय न्याय संहिता (BNS) आणि अनुसूचित जाती-जमाती अत्याचार प्रतिबंधक कायद्यांतर्गत (Atrocities Act) गंभीर कलमे लावून गुन्हा दाखल केला आहे.
पोलिसांनी दिलेल्या माहितीनुसार, आरोपीविरुद्ध शेगाव शहर पोलीस ठाण्यात गुन्हा क्रमांक ८०/२०२६ अन्वये, तसेच BNS कलम ६४, ७४, ३५१(२) आणि ॲट्रॉसिटी ॲक्टच्या कलम ३(१)(W), ३(१)(W)(२), ३(२)(V) नुसार कारवाई करण्यात आली आहे. भर उजेडात आणि तीर्थक्षेत्राच्या ठिकाणी घडलेल्या या घटनेमुळे भाविकांमध्ये आणि स्थानिक नागरिकांमध्ये तीव्र संताप व्यक्त केला जात आहे. या प्रकरणाचा पुढील तपास पोलीस करत असून, आरोपीला कठोर शिक्षा व्हावी अशी मागणी जोर धरू लागली आहे. वरिष्ठ पोलीस अधिकाऱ्यांनी या घटनेबाबत अधिक भाष्य करण्यास नकार दिला असला तरी, या घटनेने शहराच्या सुरक्षिततेवर गंभीर प्रश्नचिन्ह निर्माण केले आहे.
