पहिल्याच पावसाने SBI कॉलनीतील विदारक वास्तव समोर; रस्ते बांधण्याची आश्वासने अद्याप कागदावरच
शेगाव शहरातील SBI कॉलनी परिसरात पहिल्याच पावसाने नागरिकांच्या समस्या पुन्हा एकदा ऐरणीवर आल्या आहेत. रस्त्यांच्या अभावामुळे परिसरात चिखल, पाण्याचे साचलेले डबके आणि वाहतुकीस अडथळे निर्माण झाले असून नागरिकांना मोठ्या गैरसोयींना सामोरे जावे लागत आहे.
स्थानिक रहिवाशांनी अनेक वेळा प्रशासन आणि लोकप्रतिनिधींना निवेदने देऊन रस्ते बांधण्याची मागणी केली होती. निवडणुकीच्या काळात तसेच पावसाळ्यापूर्वी परिसरात रस्ते बांधून देण्याची आश्वासने आणि हमी देण्यात आली होती. मात्र आजही परिस्थितीत कोणताही बदल झालेला दिसत नाही.
नागरिकांचे म्हणणे आहे की, पहिलाच पाऊस पडताच अशी अवस्था झाली असेल, तर संपूर्ण पावसाळ्यात परिस्थिती किती गंभीर होईल याची कल्पना सहज करता येते. पुढील काही महिन्यांत नागरिकांना अधिक त्रास सहन करावा लागण्याची शक्यता व्यक्त केली जात आहे.
विशेषतः विद्यार्थी, ज्येष्ठ नागरिक, महिला आणि वाहनचालकांसाठी हा मार्ग धोकादायक बनत असून, एखादी दुर्घटना घडण्याची भीतीही व्यक्त केली जात आहे.
“पहिल्याच पावसात ही अवस्था, मग संपूर्ण पावसाळ्यात काय?”
SBI कॉलनीतील नागरिकांचा प्रशासनाला सवाल; रस्ते बांधकाम तातडीने सुरू करण्याची मागणी.
